ബെംഗളൂരു: ഐഎസ്ആർഒയുടെ തലപ്പത്ത് നിർണായക മാറ്റങ്ങൾ. ഹ്യൂമൻ സ്‌പേസ് ഫ്ലൈറ്റ് സെന്റർ (HSFC) മേധാവിയായി മലയാളിയായ എസ്.ആർ. ബിജുവിനെ നിയമിച്ചു. ഗഗൻയാൻ പദ്ധതിയുടെ ചുമതല ഇനി എസ്.ആർ. ബിജുവിനായിരിക്കും. ഗഗൻയാൻ പദ്ധതിയുടെ ആദ്യ ആളില്ലാ ദൗത്യത്തിനും അദ്ദേഹം നേതൃത്വം നൽകും.
പി.എസ്.എൽ.വിയുടെ നിർണായക ദൗത്യങ്ങൾക്ക് നേതൃത്വം നൽകിയിട്ടുള്ള പരിചയസമ്പന്നനായ ശാസ്ത്രജ്ഞനാണ് എസ്.ആർ. ബിജു. മനുഷ്യനെ ബഹിരാകാശത്തേക്ക് എത്തിക്കാനുള്ള ഇന്ത്യയുടെ സ്വപ്നപദ്ധതിയായ ഗഗൻയാനിൽ അദ്ദേഹത്തിന്റെ നിയമനം ഏറെ നിർണായകമാണ്.
അതേസമയം, യു.ആർ. റാവു സാറ്റലൈറ്റ് സെന്ററിനും (URSC) പുതിയ മേധാവിയെ നിയമിച്ചു. നിലവിലെ ഡയറക്ടർ എം. ശങ്കരൻ വിരമിക്കുന്ന ഒഴിവിൽ ഡി.കെ. സിങ് ചുമതലയേൽക്കും. നിലവിൽ ഹ്യൂമൻ സ്‌പേസ് ഫ്ലൈറ്റ് സെന്റർ മേധാവിയായ ഡി.കെ. സിങ് ഓഗസ്റ്റ് 31ന് യു.ആർ.എസ്.സിയുടെ ഡയറക്ടറായി ചുമതലയേൽക്കും.
യു.ആർ.എസ്.സിയിൽ രണ്ട് പുതിയ ഡയറക്ടർ പദവികളും സൃഷ്ടിച്ചിട്ടുണ്ട്. ആർ ആൻഡ് ഡി വിഭാഗം ഡയറക്ടറായി എസ്. സുധാകറിനെയും പ്രോജക്ട്സ് വിഭാഗം ഡയറക്ടറായി ജസ്‍വീന്ദർ സിങ് ഖൊറാലിനെയും നിയമിച്ചു.
